Se leron o artigo anterior lembrarán que puxen sobre a mesa a QAnon, a teoría da conspiración da extrema dereita que naceu en Internet e que se popularizou nos últimos tempos. Entre outros argumentos, defenden que existe unha escura rede de pederastia na que están implicados políticos e artistas de diferentes eidos. Os seguidores de QAnon están convencidos de que Donald Trump loita en segredo contra esta organización. De feito, vaticinaron que estamos vivindo un proceso que terá o seu punto álxido coa “Tormenta”, cando Trump consiga restaurar a grandeza dos EE.UU desenmascarando e castigando a todas as persoas implicadas na suposta rede de pederastia. A este momento máximo de triunfo de Trump chámaselle Tormenta, porque no 2017, durante unha sesión fotográfica xunto a altos líderes militares, o expresidente fixo o seguinte comentario: “Vostedes saben o que representa isto? Talvez sexa a calma antes da tormenta.” O FBI advertiu que QAnon representa unha ameaza terrorista potencial. Mentres, a teoría da conspiración non deixa de medrar e deixarnos momentos para a Historia, como o recente asalto ao Capitolio. QAnon é o único grupo de extrema dereita implicado neste feito. Os Proud Boys, outra facción perigosa de extrema dereita, tamén estaban alí presentes. Un par de días antes deste suceso, o seu líder, Enrique Tarrio, foi arrestado por posesión de armas e por queimar nunha histórica igrexa negra unha bandeira co lema Black Lives Matter. Os Proud Boys defínense a si mesmos coma chovinistas occidentais. A realidade é que son misóxinos (na súa agrupación non está permitida a participación de mulleres), islamófobos, transfóbicos e racistas. Donald Trump agradeceu o apoio dos Proud Boys en varias ocasións. Despois arrepentiuse e rectificou, baixo a escusa de que os comentarios de apoio a este grupo foran un “lapso”. A realidade é que estas faccións radicais foron medrando alentadas polas mensaxes e chiscadelas que Donald Trump lles foi facendo chegar durante todos estes anos. QAnon convertéronse en asiduos dos seus mitins. De feito, sendo presidente dos EE.UU, Trump recibiu no Despacho Oval a Lionel Lebron, un dos principais teóricos de Qanon, e posaron xuntos nunha sesión fotográfica. O expresidente tamén declarou: “teño entendido que me queren moito e iso é algo que agradezo. Escoitei que esa xente ama ao noso país”.
Para algúns dos defensores de QAnon, formar parte desta teoría da conspiración é como participar nun videoxogo masivo de realidade compartida, con escenarios que mudan e narrativas intensas. Para eles, participar nos actos de QAnon é como xogar unha partida con diferentes misións a superar, desde o pizzagate ata o asalto ao Capitolio.
Coa toma de posesión de Biden, os seguidores de Qanon están desconcertados. Agardaban con ansia o momento da Tormenta, mais non viron cumpridas as súas expectativas. Algúns comentaron que fora bonito coñecerse e que esta experiencia servira para gozar e que chegara o momento de abandonar. Outros, traballan preparando novas conspiracións. Quizais alimentados polas últimas declaracións de Donald Trump, onde confesou que non descarta volverse presentar como candidato para presidir EE. UU.