Suscríbete

Contenido exclusivo para suscriptores digitales

O merlo e o tempo

Con vontade de fondura

Detalle da portada de "Folgos", de Jei Noguerol.

Son xa cincuenta anos os que transcorreron tras dos primeiros lanzamentos musicais de Jei Noguerol, referente da Nova Canción Galega a carón doutros nomes coma Xerardo Moscoso ou Miro Casabella. Agora, noutro século e con algunhas feridas en Galicia tan abertas como hai décadas, chega este primeiro libro publicado de Noguerol: Folgos. Trobas existenciais. Dende o inicio, transloce unha ollada clara e limpa cara ao tempo vivido, cun protagonismo no ritmo nos versos e mesmo na rima que remiten, inevitablemente, á dimensión artística dominante no autor, a música.

A cita que abre o libro, de Marco Aurelio, é reveladora e ten un valor anunciador. Dinos que o retiro está dentro do espírito dun mesmo e remarca, así, a forte pegada íntima destas trobas existenciais. Poderiamos dicir que se abre unha ruta polos sendeiros interiores na traxectoria de Noguerol: contraditorio e dubitativo, afírmase, mais sen abandonar a vitalidade. Cómpre saír xa a cómbaro aberto / para chegarmos sen feridas ao presente. Non obstante, nesa contradición aparece tamén a melancolía ou certa sombra: Quedan dúas marés para deixar o barco / para deixar de navegar logo de tantos anos. Sexa a ollada vitalista -mesmo irónica e mordaz nalgúns momentos- ou sexa a melancólica, permanece unha vontade de fondura, de transcendencia. Moi lonxe non irei: / vou a min mesmo.

Ademais da introspección, no libro latexa a contemplación. A herba, as mazás, o asubío do merlo, o mesmo transcorrer do tempo no ceo, o rexistro das sensacións polo contacto coa natureza e os seus sons. Evocacións sensoriais e tamén hábitos, coma ir buscar o leite, que remiten a un tempo pasado de ambiente calmo e incluso idealizado porque chama a atención que o autor, referente da canción protesta naquelas décadas, decidise rexistrar a vida rural sen que albisquemos conflito social.

En definitiva, se hai un termo salientable porque se repite e exerce como fío condutor do libro, é “destino”. Aquí cheguei. Daquí xa non me movo.

NOGUEROL, Jei, Folgos. Trobas existenciais, Xerais, Vigo, 2021, PVP. 9,02€

Compartir el artículo

stats