De facer bailar aos seus curmáns de nena a estrear espectáculo

A viguesa Eva Comesaña bailaba dende pequena. De nena, ata montaba coreografías para os seus curmáns para faceren entre todos bailes. Pouco a pouco iría collendo máis e máis interese pola danza pasando polo hip hop, o ballet e o contemporáneo.Un día, decatouse de que era a súa “paixón” e xa non deixou de soñar con dedicarse a esta arte como profesional. Hoxe e mañá en Vigo, a súa casa, cumpre o seu soño coa estrea da peza “Perder a lingua”.

A cita é na Sala Ártika de Vigo esta fin de semana a partir das oito da tarde, e coas entradas a 14 euros.

Explica Eva Comesaña que o proceso de elaboración desta obra “xurdiu dunha creación da artista visual Eva Antelo, que estaba nun proxecto investigando sobre a liña que deixa unha persoa ao falar –a liña sonora– e a liña da paisaxe. Coincidimos nunha residencia artística en Camelle, na Casa do Alto. Púxenme en contacto con ela para facer algo”.

O resultado é “Perder a lingua”, con danza e música en directo. Respecto da música, de Rubén Fernández, esta é efectuada de xeito vocal con “loop station” e vai creando capas con sons. “É como unha viaxe sonora na que cada unha vai creando a súa linguaxe artística no transcurso da peza”, explica Comesaña para destacar os silencios, respiracións e sons guturais que se enlazan con música tradicional galega. Ao mesmo tempo, desde o corpo mudo sen lingua vaise construíndo un corpo “collendo imaxes do baile galego”, engade a creadora galega.

A paisaxe tamén ten grande importancia fixándose na contorna, nas montañas galegas, que se plasman na coreografía.

Recoñece Eva Comesaña que a peza de danza é unha “defensa do idioma”, o que constrúen bebendo da tradición co emprego da música en galego e coa observación “da liña de horizonte ata os costumes, o carácter da xente, o territorio, a xeografía”.

Comesaña sinala que é importante reflexionar que acontecería se non tiveramos o noso idioma; se no caso de que se perdera que acontecería.

A bailarina confía en que a peza poida rodar mesmo fóra de Galicia xa que se pode “extrapolar a calquera territorio”.